كيف تحقق أي هدف في حياتك !؟

﴿ لِمَن شاءَ مِنكُم أَن يَتَقَدَّمَ أَو يَتَأَخَّرَ ﴾ مقال وتأمل في ما معنى الآية ..

وبغير حياتك للأفضل اوعدك التقدم او التأخر اختيارك وكل شخص يقدر يختار الجانب المريح له خياريين لا ثالث لهما ما فيه حل وسط ومافيه احد بيجي يعلمك الطريق والخطوات لكل شخص منا طريقه وخطواته مستحيل نتشابه!

تذكر السؤال الدارج بكل المقابلات الشخصية : ” وين تبي تكون بعد خمس سنوات ؟ “
مهما كان جوابك عليه ما راح توصل له الا بالتدرج الا بالخطوات الصغيرة الا برسم خطة لطريقك اكثر شيء كنت أتكلم عنه الخطوات الصغيرة عاداتك الصغيرة اذا تراكمت لا تبدأ بقفزة كبيرة ابدأ بخطوة فقط اكتشفت ان فيه ناس كثيرة ماتدري ايش معنى هالكلام ناس فقط تشوف النتائج تشوف اعلى الجبل ناس ما حسبت او توقعت العثرات
الهزائم العراقيل تحسب الطريق مستوي ومليان وورد الحياة الجديدة خلتنا نطفش بسرعة ونمل تعودنا كل شيء نحتاجه بضغطه زر وهو عندنا وهالشيء اشوفه السبب اللي جعلنا مستعجلين بكل شيء مستعجلين بالنتائج نبي نصير من اول يوم اقوى مبرمج وافضل مصمم وكاتب مخضرم وهالشيء مخلينا نتوقع بنصل للنتيجة على طول بعطيك سؤال عشان تفهم
ايش اقصد بالخطوات الصغيرة هل تعلمنا الكتابة اولًا ولا الحروف ؟ تعلمنا الحروف اولًا ثم كتبنا الحروف ثم بدينا نكتب كلمات للحروف ثم وصلنا للإملاء ثم التعبير عشان نوصل للخطوة الأخيرة كانت الخطة :

1- تعلمنا شكل الحرف
2- تعلمنا نطق الحرف
3- تعلمنا كتابة الحرف
4- كتبنا كلمات تبدأ بنفس الحرف
5- حفظنا طريقة كتابتها من السمع
6- والخطوة الأخيرة تراكمت الكلمات وصرنا نعرف نكتب

الخطوات اللي ذكرتها فوق كم اخذت وقت وانت تحاول تتعلمها ؟ سنة على الأقل .. سنة خلتك مدرك لكل شيء مكتوب سنة غيرتك وفتحت لك افاق وتحديات اكبر بالمثال السابق اللي مرينا فيه كلنا ابن حياتك عليه .. اهدافك طموحك قسمها لخطوات عشان يتضح الطريق لك عشان ما تتشتت في مرحلتك كل شيء جميل حولنا واي ابداع واي ناجح نشوفه ونتمنى نصير مثله ماهي الا تراكمات من الخطوات الصغيرة التفاصيل الصغيرة اللي نشوفها تافهة او مانحتاجها هي الأساس للبناء هي الأساس للثبات والقوة.

في خطواتك الصغيرة انتبه من :

• • الثرثرة وازعاج الناس ” اقضوا حوائجكم بالكتمان ” في مرحلتك للتغير ولتطوير ذاتك لاتتكلم وتزعج الناس اشتغل على نفسك بهدوء مانبي نسمع منك وش بتسوي نبي نشوف وش سويت ..

• • عدم تجهيز خطة تجهيز الخطة امر ضروري جدًا لتكون على معرفة بالطريق والوقت والزمن مثال تعلم الاحرف السابق ماهي الا خطة كانت لتعلم الكتابة

• • عدم التقييد بالخطة عدم التزامك بالخطة والوقت ماهو الا تضيع وقت وفشل مبكر لاتقول ماعندي وقت اشغل نفسك صدقني لو ماعندك وقت ماكنت تقرأ هالثريد في خطواتك الصغيرة اسعى لأهدافك لوحدك لا تبحث عن الدعم العاطفي ومداراة الناس لك ما يحتاج تتحلطم بتويتر عشان النت ثقيل وانك مو قادر تتعلم ووقفت حياتك ترى كلنا اذا شفنا كذا نشوفك ضعيف ومهزوز وماراح تكمل او تنجز بحياتك وانت فقط تبحث عن التعاطف لأنك
    مو قادر تسوي شيء بحياتك انت المسؤول عن مستقبلك اشغل نفسك بنفسك لنفسك ! اشغل وقتك في تطويرك عشان مستقبلك.

البداية والتغير صعب لكن يشهد الله جميل، انا لي سنتين او اكثر من بديت في بناء عادات صغيرة وقاعدة تتراكم على بعض مع مرور الأيام ما وصلت للي ابيه للحين لكن خطواتي الصغيرة بعد توفيق الله بتوصلني للي ابي ..
مستمتع جدًا بالطريق ومتعته لأني قاعد اكتشف انا مين وايش قادر اسوي، على فكرة حياتك توقف اذا ماحسنت وطورت من نفسك، ختامًا القرار قرارك والمستفيد او الخاسر انت فكر بـ ايش الأثر اللي بتتركه بعدك ؟

كتبت عن 9 طرق ترفع مستوى رضاك على نفسك