النشرة رقم 85

سلام عليكم صباح او مساء الخير، هالصباح قمت مروق ومزاجي عسل فـ افطرت بروقان وتقهويت وكتبت النشرة وانا ماوراي شيء على عكس الفترة الماضية صباح الثلاثاء يكون مراكض وجهاد!

في هذا العدد بتقرأ عن :

هل الخوارزمية كل شيء!؟
سويت ستيكرات 🥳

تدور اشتراك برامج ادوبي ولا مايكروسوفت بسعر وضمان عليه الكلام؟

متجر اشتراكاتي انا عميلهم من سنين ومريح رأسي

هل الخوارزمية كل شيء!؟

في كل مرة احد يشتكي لي من ضعف التفاعل ..
او يقول " الخوارزمية تحاربني او ماتساعدني "

" كله من ايلون ماسك " " رجعوا تويتر لنا "

يجي ببالي سؤال يعني كلنا تحاربنا؟ يعني المنصة تخرب نفسها بنفسها؟

اخذت فترة طويلة اجرب في منصة اكس واحوس، عشان افهم ايش صاير جربت نوع محتوى جديد اوقات نشر مختلفة جربت ثريدات ومقالات مطولة

من التجارب اللي سويتها بحسابي في اكس

نفس المحتوى حرفيًا خليته تغريدة وحدة وسويته ثريد وسويته مقال مطول النتائج والوصول جدًا متقاربة!

طيب كيف نوصل بشكل اكبر؟

انا اقول لك الخوارزمية مو عدوك، ومنصة اكس مايعطونك شادو باند او يقللون وصولك .. الخوارزمية ببساطة تعكس حب جمهورك لمحتواك

إذا المحتوى شدهم وخلاهم يوقفون في التايم لاين على تغريداتك ويشاركونها ويردون هنا الخوارزمية تشتغل لحسابك مو ضدك

طيب يانايف كيف اخلي كل الناس تقرأ محتواي؟

1- ابدأ بـ Hook قوي! ولاتكذب

سؤال او جملة تصدمهم او مثال، او شيء يخليني أوقف التحريك بالتايم لاين ترى المتابع مايعطيك إلا 3 ثواني، من اول سطر شدّه!

2- قلل اللف والدوارن

كلنا مشغولين والله نبيك تقول لنا المعلومة او الفكرة ببساطة

3- تكلم عنهم مو عنك

المحتوى اللي يوصل هو اللي يخلي القارئ يقول:

" هذي مشكلتي "

اربط أفكارك بمشاعرهم

4- خل التنسيق يخدمك

سطر قصير وفراغات واضحة و ايموجيات

اترك العين تنتقل .. لاترص الكلام فوق بعضه!

5- كرر بس لاتطفش العالم

نفس الفكرة تقدر تقولها بكذا طريقة، لكن لاتكرر نفس الجمل بالضبط

غير الشكل والتنسيق، زود القيمة، ولا اربطها بقصة

ختامًا الخوارزمية مو سحر هي تبين لك الناس ايش حبت وايش تفاعلت معه.

واذا تبي الخوارزمية تشتغل لك .. اكتب شيء يشتغل لهم

سويت ستيكرات 🥳

الفترة الماضية شفت نفسي طفشان فقلت اسوي ستيكرات بدال الابتوب السادة 🦦

وبرضوه من باب تجربة جديدة وانبسطت الصدق 🥳

لو ابيعها تشترون 🤓؟

جداركم

تبي توصل كلامك ومشاعرك للناس ؟ تبي رسالة لكل المشتركين، أو تبي الناس تقرأ لك وماتعرف مين أنت ؟ اكتب اللي تبي وحتى انا مااعرف مين انت!؟

لإرسال مشاركتك

المدارى منه يكفيني

اكتشفت ان ما عندي حياه بدون الجامعه ولكن الحمدلله .. صرت ادخل على النشرة واستانس على المحتوى اعطيك لايك ثلاث مرات

انا رقم حظي ٩ مدري ليه انا بنفسي اخترته وبعد عندي ملاحظه ياكثر ما ناظرت الساعه واحصلها ١١:١١ كلها الليل 😂😂 مرات اصورها لذكره 🤭

نبي الشتاء لو سمحتوا

ان جاتنا الطيبه بالطيب زدناها
الطيبه بالعسـل والسمـن نمزجهـا

وان جاتنا الثانيه نصبـر ونرفاهـا
يمكن اليـا فاق راعيهـا يعالجهـا

وان عادها عـودةٍ ماعـاد ينساهـا
من حربةٍ في صميم الصدر نولجهـا

مسمومةٍ يبلـش الدكتـور بدواهـا
مايقنـع الخبل لين انـه يلامجـهـا

التصويت الأسبوعي

تصويت هالاسبوع عن :

اذا قل وصول محتواك .. ايش تقول لنفسك؟

الخوارزمية ضدي!

الوقت غلط

المحتوى مو مرة

نتائج التصويت السابق :

هل انت مهتم بتحليل وقراءة محتوى بهدف تطوير مهاراتك؟

69% ايه

27% أحيانًا

4% لا

نايف ثلاث مرات

ارسلت هذي النشرة من المكان السري

وصلتك هذي الرسالة لانك مشترك .. مافي سبب ثاني ترى

تبي تقطع الوصل؟ | تحدث بياناتك | تشوف النشرة على المتصفح

🦦 هل الخوارزمية كل شيء؟