الفهرس :
المقدمة
في هالمقالة بذكر لك 8 طرق لزيادة التفاعل على مواقع التواصل الاجتماعي و طرق واستراتيجيات مجربة بتساعدك في زيادة التفاعل والمشاركة لمحتواك، بمجرد ماتطبقها وتصير هي استراتيجيتك بتساعدك في نمو حساباتك في مواقع التواصل الاجتماعي
اذا تعاني من قلة التفاعل مع محتواك اللي تنشره؟
وتشوف الكل قاعد ينشر محتوى عادي مو رهيب زي اللي تقدمه! وعندهم تفاعل لكن انت ماعندك تفاعل!
طيب كيف تجذب جمهورك عشان يتفاعلون معك!
1- افهم جمهورك بعمق!
قبل ماتبدأ في كتابة المحتوى او صناعته، لازم تعرف من هو جمهورك المستهدف؟ ايش جنسهم؟ كم اعمارهم؟ وش اهتماماتهم؟ وش التحديات والمشاكل اللي تصادفهم؟اذا عرفت كل هالمعلومات تقدر تبني محتواك اللي يلامسهم يلامس اهتماماتهم ويحل كل مشاكلهم ويقدم لهم حلول فعلية، وتصير انت المرجع في مجالك!
2- استخدم عناوين قوية!
الخطافات او العناوين هي اول شيء يجذب المتلقي، هي اللي تحفزه يكمل يقرأ أو يشوف محتواك أو لا لذلك ركز على:
- عناوين قصيرة
- عناوين واضحة
- عناوين جذابة
- عناوين مختصرة
- عناوين تثير الفضول
بمجرد مايكون العنوان فيه اللي ذكرته فوق صدقني بتجذب لك جمهورك يكملون القراءة ويتفاعلون معك، كل جهدك ووقتك وطاقتك ركز فيه على بناء العناوين اللي تجذب الناس وصدقني بيرتفع معدل نمو حساباتك بشكل مو طبيعي في وقت قصير!
3- تفاعل مع جمهورك
التفاعل مع جمهورك وتفاعلك مع محتواهم طريقة رهيبة مرة عشان تعزز من المشاركة، جاوب على أسئلتهم واشكرهم على تفاعلهم معك شاركهم في النقاشات، هالنوع من التفاعل يحسس جمهورك بأنك تسمعهم ومقدر لهم تفاعلهم وهو اللي بيزيد من احتمالية مشاركتهم لمحتواك، لانه بمجرد مايحس انك فعلًا تعطي الاهتمام والرد عليه يرتفع عنده الولاء لك وللي تقدمه لذلك لاتهمل هالنقطة أبدًا
4- اصنع محتوى تفاعلي
أسئل جمهورك أسئلة تناسبهم أو في مجالك، أو سو استطلاعات أو اختبارات، هالنوع من المحتوى مو بس ممتع بعد يحفزهم على المشاركة والتفاعل بشكل أكبر وكل مازاد التفاعل كل ماحبتك خوارزميات المنصة اللي انت متواجد فيها
5- النشر في الأوقات المناسبة
دايم يجيني سؤال متى أفضل وقت انشر فيه؟ فيه أدوات كثيرة مدفوعة وغالية و ماتستاهل هالسعر عشان ميزة زي كذا، بالنسبة لي دايم أقول انشر حول أوقات منافسيك اذا ما نجحت معك جرب طول اليوم واكتشف انت بنفسك وحلل ايش افضل وقت لك، واذا حسيت نفسك تبي تمخمخ وتروق لهذي النقطة ترى تفاعل يوم الاثنين الساعة 8 بالليل مو نفس يوم الثلاثاء الساعة 8 بالليل يعني لكل يوم بالاسبوع له ساعة ذهبية لمتابعينك!
6- استخدم الفديوهات والصور
المحتوى المرئي عنده قدرة خارقة في جذب الانتباه بشكل أسرع مليون مرة من النصوص فقط! استخدم صور وفيديوهات قصيرة عشان تزيد فرص التفاعل، لكن تأكد ان المحتوى المرئي اللي تنشره يناسب فئتك المستهدفة ويوافق لرسالتك اللي تبغى توصلها، لاتصير عشوائي في استخدام الصور والفيديوهات تنشر شيء مايهم جمهورك لانك بـ هالطريقة بتشتتهم وتبعدهم عنك، وممكن حتى يلغون متابعتك!
7- اختبر وحلل النتائج
لاتتوقع ان نشر المحتوى بس يكفي او الموضوع ان مانجحت وانت تنشر محتوى انت مو محظوظ!
استخدم أدوات التحليل اللي موجودة بكل منصة، عشان تعرف وش التغريدات اللي حبها جمهورك وايش اللي ماحبوها، عشان تعرف وش افضل يوم للنشر وافضل وقت للنشر
8- هدايا للمتفاعلين
( ميمز مالها مصدر لقيتها بجوالي )
ممكن تستغرب هالشيء لكن قبل فترة كنت اعطي استشارة مجانية لأعلى ثلاث اشخاص متفاعلين بتويتر ووقفت الطريقة مؤقتًا لضيق وقتي، للامانة كنت اسويها تقدير لهم ولوقتهم وجهدهم وابسط شيء ممكن أسويه (كانت تجربة رهيبة الصدق!)
اما الطريقة المشهورة وأكثر استخدام سوا كانوا صناع المحتوى عرب أو أجانب هي ” ارسل تعليق + لايك + تابعني ” ويوصلك الملف الفلاني مجانًا، هالطريقة رغم اني مااحبها لكن الخوارزميات تحدك احيانًا على أشياء انت ماتبغاها لكن هدفك في النهاية كصانع محتوى هي النمو سوا في عدد المتابعيين او العملاء او التفاعل او ايش ماكان هدفك!
ختامًا
تفاعل الناس وبناء الجمهور مو مسألة حظ، الموضوع يبي له تخطيط استراتيجي وفهم عميق لجمهورك، النصائح أعلاه بتساعدك في بناء براندك الشخصي والنمو فيه بمواقع التواصل الاجتماعي، وإذا تحتاج احد يساعدك في بناء براندك الشخصي او بناء استراتيجية للمحتوى الخاص فيك تقدر تحجز معي استشارة وبساعدك في بناء براندك الشخصي والنمو فيه اضغط هنا لحجز موعدك!