باب ما جاء في ضبط النفس تقدر تتحكم بغضبك ؟ ولاانت انسان سهل استفزازك ؟

عندي نظرية للتعامل مع مشاعر الغضب سميتها نظرية المرقوق أقرا المقال عشان تعرف سبب التسمية وبقنعك!

احب المرقوق اولًا عشان كذا سميتها نظرية المرقوق فيه ناس تتوقع ان الغضب قوة !

لا ياعزيزي الغضب ضعف وانكسار الغضب دليل على قلة الحيلة عن حميد بن عبد الرحمن بن عوف أن رجلًا أتى النبي ﷺ فقال : ” يا رسول الله علمني كلمات أعيش بهن ولا تكثر علي فأنسى، فقال رسول الله ﷺ : لا تغضب ” .
المرقوق اول مايطلع من القدر حار ويطبخ ومانقدر ناكله او نتلذذ فيه الحل : ننتظره يبرد نفس المبدأ اطبقه لاصار موضوع استفزني او موضوع ضغطني نفسيًا انتظر لين ابرد داخليًا وافكر الشيء اللي صار هل اقدر اصلحه ؟ هل اقدر اعيد الشيء بدون تكرار الاخطاء ؟ اذا مايتصلح وش بستفيد اني عصبت وضغطت عمري ؟ اذا اقدر اعيد الشيء ليه اعصب طيب ؟ كذا او كذا مايستاهل صدقني.

نصيحة !

اذا جاك شخص منفعل ومعصب ويبي يسحبك للمستنقع اللي هو فيه لاترد عليه ولاتعطيه اهتمام لا برد مرقوقه تفاهم معه لانه جاك وهو حار وبتصير حار انت بعد فطبيعي جدًا تتهاشون وممكن توصل للقطاعة!

” هذا الوقت سوف يمضي “

تدري وش سالفة هالعبارة ؟ ياطويل العمر هذا احد ملوك الهند كلم واحد من الوزراء قال : ابي لي خاتم تكتب عليه جملة اذا قريتها وانا حزين افرح واذا كنت مستانس ينعفس جوي
فكتب الجملة السابقة قس على هذي القصة كل مشاعرك ولا تتعمق فيها .. وتنكد على نفسك

ختامًا مزاجك اهم ماتملك انت الوحيد المسؤول عن سعادتك ولـ احد يسحبك لمستنقعه !
وعلقها بإذنك ” انتظر المرقوق يبرد “

أقرا زيادة 9 طرق ترفع مستوى رضاك على نفسك